De su 1720 fintzas a su 1848, una stòria polìtiga de is lìnguas de sa Sardìnnia: sardu, spanniolu, italianu... Custu libru agatat is interessus ki teniant is Savoyas a intrai s'italianu a marolla. A imponni s'italianu, a kini di cumbeniat, a kini depiat strobai e kini nci perdiat. Cantu nci funt arrennesçus, cumenti e gràtzias a kini. In mesu, sa natzioni sarda. Milli e milli fèminas e òminis ki pesànt sa vida insoru in sa comunidadi. Cun sa fortza e cun sa debilesa, andendi a innantis e torrendi agoa. Cun sa sabiesa e cun su makìmini, cun s'atrivimentu e cun sa timoria, ke calikisiat pòpulu de su Mundu.

---

AMOS CARDIA tenit trintun'annus e bivit in Sìnnia. Laureau in Scèntzias Polìtigas in s'arramu stòrigu, de su 2003 dirigit su cotidianu www.comitau.org Arcivu Sardu de Bilinguismu e de su 2004 trabàllat cun Il Giornale di Sardegna, cun Làcanas. Rivista Bilingue delle Identità, cun Sa Repùblica Sarda e cun RadioPress. Impàrat lìngua sarda in cursus e scolas. Est in s'assòtziu curturali e de boluntariau I Sardi e in s'Acadèmia Campidanesa de sa Lìngua Sarda. At scritu jai su libru Apedala dimòniu! Contus, poesias, artìgulus e fueddàriu de bicicreta, Imprentas de I Sardi, Casteddu, 2004).