Ki una lìngua no da fuèddant is pipias e is pipius, est una lìngua morta jai.
Nci podint essi is mannus scallentaus cantu boleus, ki fueddànt de sa manera prus sintzilla
ki fait, ma ki sa lìngua no da pàssant a is pipias/us, cumenti is mannus s'ant a morri, no
d'at a sciri prus nisçunus, e at a sparessi cumenti si morit sa pagu genti beça ki
da scit. Est acadèssiu di aici po sa lìngua dalmàtìga, si scit puru kini fiat e candu est
mortu s'ùrtimu òmini ki da sciat. Mortu issu, morta sa lìngua.
E insaras su ki serbit de prus est a imparai su sardu a is pipias e a is pipius, de manera
ki sa lìngua sigat sempri fin''e candu nosu no s'eus a agatai prus.
Po cussu custu jassu esti po totu is maistas puru, po totu is mamas e is babus ki bòlint
imparai su sardu a is pipius insoru.
No nci nd'iat'essi abisonju, ma est mellus a sçolli una kistioni una borta po
totus. S'imparamentu de su sardu in is iscolas depit essi, su prus a kitzi ki fait
un'arrègula, po totu is crassis e po totu is iscolas. Ki su sardu est una lìngua
(i esti una lìngua) e ki boleus su bilinguismu (e nosu du boleus) tòcat a fai de manera
ki si potzat ponni su sardu in totu is iscolas e in totu is crassis.
Bilinguismu bolit nai ca is lìnguas nci tèninti sa pròpiu dinnidadi e funt agilitadas
de sa pròpiu manera. E insaras, cumenti s'impàrat s'italianu e s'ingresu (e craramenti
esti beni ki si sìgant a imparai, sempri mellus), tòcat a imparai su sardu puru, ki
praxat o ki no praxat.
Craramenti si depit imparai cun d-una didàtiga bona, ki scallentit a is imparantis,
ma custa esti totu un'atra kistioni, ki balit po totu is matèrias. Sa genti ki si ndi
scìdat ki po su sardu bolit un'imparamentu libertàriu, ma po is atras matèrias no at
domandau un'imparamentu libertàriu mai, esti genti ki no bolit su bilinguismu e ki no
tenit sa faci de du nai.
In custu jassu eis a agatai totu su ki spètat a custa kistioni. Sinnalaisi' totu su
ki faeis.
Cuncursu Literàriu po pipias/us "Sa Mariposa"
Intrebista a Marinedda Cao e a Sìrbia Callai - Maistas de Sìnnia (CA)
Cursu po pipias/us in Radio Press
Fueddàriu ingresu - sardu cun is pinturas de sa Scola de Pipiesa (IV Cìrculu) de Cuartu
