Nosu de s'Arcivu Sardu de Bilinguismu eus cumintzau a s'acorrai in su 2001, ki in su tempus femus totus studiantis unibersidarjus. Si femus postus impari po studiai sa lìngua sarda e difatis si naramus Comitau Studiantis po sa Lìngua Sarda.

Andendi a innantis seus bessius in is annus una truma de personis de donnya edadi e de donnya traballu, ki studiaus sa lìngua sarda e traballaus po su bilinguismu in Sardinnya.

Imoi du at personis bonas a imparai, atras a scriri, atras a tradusi, atras a fai jassus e CD-ROM, atras a fai mùsiga e aici nendi. Donnya sperièntzia e donnya spertesa nosta da poneus po sa lìngua sarda, po adelantai e arricai sa Terra nosta.

Unus cant''e nosu po imoi stùdiant e bàstat, atrus fàinti custus traballus po discansu, atrus ancoras tèninti custas fainas a primu traballu.

In sa màngara IS SERBÌTZIUS NOSTUS podeis biri is traballus ki faeus... e ki podeus fai po bosatrus e totu!