GRAMSCI FIAT PO SA LINGUA SARDA...
(bogau de isardi.net, de su 20/06/2004)
Gramsci fiat po su bilinguismu: custu est s'acabu de su stùdiu ki at fatu s'Acadèmia Campidanesa de sa Lìngua Sarda,
ki ariserus ant amostau is arresurtaus in d-un'atòbiu in Cuartuçu, in s'aposentu 'e su Consillu Comunali.
S'interessu po s'argumentu fiat mannu e difatis nci fiat genti meda, bènnia a ascurtai de dònnia logu,
de s'ingìriu de Casteddu ma no sceti.
A pustis de is saludus de Gilberto Pisu su sìndigu e de Càralu Murru s'Assessori a sa Curtura e a sa Lìngua Sarda,
ant cumentzau is arrelatadoris, ki su primu fiat Luisu Manias de sa Bibriotega Gramsciana de Gonnosno',
sa prus manna de sa Sardìnnia. In sa bibriotega de sa bidda 'e sa provìntzia de Aristanis, difatis,
s'agàtant is primus imprentas de is librus de Gramsci e totu s'atru ki di podit spetai; su scusorju de sa bibriotega
e sa spertesa de Manias funt mannus meda e ant pigau luegus s'interessu 'e totus, puru ca e a Gramsci
d'ant studiau in dònnia logu e de dònnia manera.
A pustis, Ernestu Curreli, de sa Scola de Formadura Polìtiga de A.N., at kistionau is lìnguas noulatinas europeas,
incrarendi sa postura 'e su sardu e firmendisi' a arrexonai su sentidu de ddas amparai in di' de oi.
De sighia, su tzentru de sa kistioni dd'at spriculau Antoni Lèpori, professori de stòria e filosofia,
ki at scallentau a totus po sa mannària e sa craresa de is argumentus suus, faendi unu caminu de sa vida sarda de Gramsci,
de a pipiu fintzas a sa morti in su presoni fascista. In totu su caminu de stùdiu suu,
de sa scola ilementari fintzas a s'unibersidadi, Gramsci at tentu sempri essemprus mannus de studiaus
de sardidadi e/o de lìngua sarda, ki issu fiat abarrau sempri atacau a s'identidadi natzionali sarda sua
in Torino puru. Innoi no fait a contai totu ca no esti su logu justu, po cussu,
po torrai a ligi custa busca tòcat a abetai a ki su Comunu 'e Cuartuçu fetzat is àutus de custu cumbènniu.
De sighia at kistionau Perdu Perra imparadori de sardu, ki at spricau sa postura de Gramsci po s'imparamentu
de sa lìngua sarda a is pipius e is kistionis de su sardu in sa scola in di' de oi.
S'interessu fiat mannu po cust'arrelata puru ki , ke sa de Lèpori, d'at fata totu in sardu.
No at kistionau, ca no at pòtziu pigai parti prus, Maria Pia Garau sa visu-prefetu de Casteddu,
ki at'essi fueddau de su sardu e de is atras lìnguas natzionalis faças a sa Lei,
ma at assigurau ki at a donai s'ajudu su pròpiu po ddu ponni in is àutus.
A s'acabu, Amos Cardia s'amodadori at decrarau acabau s'atòbiu, ma no sa kistioni,
donendi unu saludu de si torrai a biri po sighiri custus argumentus impari.
Roberto Mura
